開箱男:實測小米「篋」神!刮極唔花?

作者:SHERRY    發表日期:2018-11-16 14:18:26

去旅行最緊要係咩?當然就係個篋!今期開箱就搵來網上大獲好評、名為「90分旅行箱」的行李篋,睇下係咪真係咁好用先。

「90分」這個品牌,主力推出旅行用品,屬於一間名為潤米科技公司,而這間公司就由小米投資,旗下大部分產品都可以於小米官網買到。90分旅行箱分為20吋、24吋聚碳酸酯物料,以及20吋鋁鎂合金製造,兼支援手機App開鎖的智能篋。而香港行貨暫時就只有20吋、36L容量的聚碳酸酯篋,提供月光白以及開箱的星空灰兩色,據講之後仲會推出極光藍、幻夜黑色。

90分旅行箱就屬於拉鏈「軟篋」,表面就用上德國Bayer Makrolon物料,亦即係聚碳酸酯。表面有一定硬度,體重大概160磅的開箱男就試過踩上篋,大家可以見到篋身變形情況唔明顯,相信寄倉周圍掟都唔會壓爛篋內物件。另外,篋身表面仲有蜂巢形坑紋,加上凹槽設計,官方就表示不易刮花,亦可以減低衝擊時壓力。開箱男即場用鎖匙用力狂刮篋身,篋身竟然毫無花痕,再用金屬小刀挫表面,亦無出現凹洞、凹痕,相當硬淨。

篋經常要四圍拖拉,輪子質素就決定拖拉的順暢程度。90分旅行箱就備有4個360度轉向輪子,官方表示輪子用上吸震耐磨的TPE物料,兼且有效降低移動時發現的噪音。開箱男嘗試吉篋、約2.9kg重於平滑地磚上拖拉,輪子非常順暢,而且噪音微乎其微,表現拍得住德國名廠篋。再嘗試塞滿雜物,模擬載物後篋重量提升至18kg,平滑磚地上依然非常順暢,再於行人路上凹凸水泥地拖拉,輪子仍然有不錯的順暢度,合格!此外,90分旅行箱亦設有美國TSA密碼鎖,更換密碼的方法亦相當簡單,只要用尖幼物件按壓一下密碼鎖開關,再重設密碼即可。

內籠方面,篋兩邊均設有內層間隔,一邊提供兩個網袋,一邊提供一個大間隔。而內籠用上大路的灰色聚酯纖維,耐用度相信不錯。90分旅行箱的定價不足五百港元,以造工、物料而言,性價比相當不俗。唯一要考慮就是保養,因為香港官方並無提供維修服務,僅提供7日換貨。反觀內地就提供兩年保養,外殼裂開、拉桿、輪子等零件出現問題一律免費維修,如果行貨都提供相同服務的話,吸引力就更高喇!


本文來源:http://hk.on.cc/hk/bkn/cnt/lifestyle/20170501/bkn-20170501113553408-0501_00982_001.html




Tag:
本文鏈接:http://www.premiumngifts.com/9571.html