多得你……唔少 1/6「偉大」領袖

作者:Jamie    發表日期:2018-10-16 08:46:21

呢期國際新聞嘅風頭躉,當然係三歲就識開槍、六歲識騎馬、被奉為「閃耀的太陽」嘅金正恩,咪唔記得金正恩領導有天眼通嘅異能,倒轉望遠鏡都可以睇得穿、望得遠,美國有幾多艘航母,都冇本事與天為敵。好明顯,金正恩領導能夠得天獨厚,顯然係優良遺傳使然,想當年嘅「白頭山光明星」金正日大元帥,何嘗唔係堅決、勇敢抗擊西方資本資義勢力,令大美帝一籌莫展、知難而退?為了向「二十一世紀的嚮導星」金正日大元帥致敬,Figure品牌BBK最近發表了一款名為Supreme Leader、激似金大元帥嘅1/6 Action Figure,點解唔索性以金大元帥嘅名字命名?斗膽,「主體的燦爛太陽」嘅偉大名字,豈容以下犯上,隨便寫、隨便講,所以有此忌諱上嘅安排,一定係,除非唔係……

講番Figure本身設計,頭雕唔使多,只要神似,一個就夠曬,金框眼鏡加埋發咗福嘅……Sorry,我講錯,我掌嘴,係有福氣、穩重嘅面形輪廓,不怒而威,仲有標誌性嘅捲髮,以及全世界只有金大元帥一人Carry得起嘅「金正日外套」,「革命同志愛的最高化身」就係型得起,偉人嘅Taste,我哋呢啲凡夫俗子冇辦法領會得到,對住個Figure羨慕嚇就得。不過BBK呢款新作仲有不足之處,製作單位要好好反省,正所謂丞相肚內可撐船,何況係心懷全球人民、「二十一世紀的世界首領」嘅金大元帥,生前有個大肚腩都好合情理,喺呢個位置,呢款1/6 Supreme Leader明顯落唔足料,咁離譜,難道BBK唔怕被導彈攻擊?定係BBK一早估到,有某啲地區嘅導彈根本飛唔起、射唔中?

「斗膽」嘅唔只BBK,仲有DID,後者早前推出咗對北韓針鋒相對嘅美國總統「侵侵」1/6 Action Figure,服飾方面係大家見慣見熟嘅黑色西裝、白色恤衫及紅色領呔,頭雕方面就有兩款,一款係正經Look,至於另一款講嘢Look就有神髓得多,確有真人嗰種寸嘴Feel。唔只美國,呢款Figure仲已經喺海外上架,就連香港都有份,覺得有趣嘅Figure玩家,不妨到旺角銀城廣場,以及銅鑼灣地帶嘅Figure專門店一逛,睇睇實物有幾多成相似?


本文來源:http://hk.on.cc/hk/bkn/cnt/lifestyle/20170501/bkn-20170501100017332-0501_00982_001.html




Tag:
本文鏈接:http://www.premiumngifts.com/9572.html